Kotu ta bayar da umarnin tsare tsohon Akanta Janar Idris a gidan yari na Kuje

Wata babbar kotun tarayya da ke Abuja ta bayar da umarnin tsare tsohon Akanta Janar na Tarayya Ahmed Idris da wasu mutane uku da ake tuhuma a gidan yari na Kuje.

A ranar Juma’a ne aka gurfanar da Mista Idris tare da wadanda ake tuhumarsa a gaban mai shari’a Adeyemi Ajayi bayan tuhumar sa da aikata laifukan sata da kuma zagon kasa da suka kai Naira biliyan 109.4.

Tsohon AGF da sauran wasu abokan aikin sa – Olusegun Akindele, Mohammed Usman da Gezawa Commodity Market and Exchange Limited, sun ki amsa laifuka 14 da EFCC ke tuhumarsu da su.

Lauyan Mista Idris, Chris Uche ya roki kotun da ta baiwa wanda ake tuhuma damar ci gaba da jin dadin belin da hukumar yaki da cin hanci da rashawa ta yi masa.

Mista Uche ya kara da cewa hukumar EFCC na da wadanda ake tuhuma da fasfo na kasa da kasa, don haka a bar su su dawo ranar litinin domin karbar takardar belin su.

Lauyan ya roki kotun da ta ba wa wadanda ake kara izinin dawowa ranar Litinin kuma kada a tsare su a duk wani gidan gyaran hali. Sai dai lauyan EFCC, Rotimi Jacobs, ya ce belin gudanarwa ya kare da zarar an shigar da karar.

Da take yanke hukuncin, mai shari’a Adeyemi Ajayi ta ce kotun ba yar tsana ba ce don yin rawa da ra’ayin jama’a.

Da yake shiga tsakani, lauyan Idris ya roki kotun cewa saboda rashin tsaro da gidan gyaran jiki na Kuje ke ciki, ya kamata a ci gaba da tsare wanda yake karewa a hannun EFCC.

Sai dai mai shari’a Ajayi, ya sha umurci babban Lauyan ya zauna, yana mai jaddada cewa babu wanda zai iya soke umarninta a gabanta.

Daga bisani ta dage ci gaba da shari’ar har zuwa ranar 27 ga watan Yuli domin sauraren karar neman beli.

Leave a Reply

Your email address will not be published.