Uwar gidan shugaban kasa, Aisha Buhari, ta yi kira ga al’ummar Musulmi da su yi amfani da lokacin watan Ramadan wajen karfafa addu’o’in samun zaman lafiya da tsaro a Najeriya.
Misis Buhari ta yi wannan kiran ne a daren ranar Talata a lokacin da ta karbi bakuncin matan hafsoshin tsaro da sauran manyan jami’an gwamnati zuwa buda baki a watan Ramadan a fadar gwamnati da ke Abuja.
Ta ce Allah madaukakin sarki ya sake baiwa ‘yan Najeriya damar sake koyawa kansu azumi da addu’o’i domin tabbatar da zaman lafiya da ci gaban kasa.
Uwar gidan shugaban kasar ta kuma bukaci ’yan Najeriya da su kara nuna kyakykyawan dabi’u na tarayya, soyayya, goyon baya, yafiya da sadaukarwa domin ci gaban bil’adama da Nijeriya.
Misis Buhari, yayin da take nuna godiyarta ga Allah Madaukakin Sarki da ya ba ta damar ganin watan Ramadan na 2022, ta bayyana fatan ganin wannan lokacin zai samar wa kasar nan yalwar zaman lafiya da kwanciyar hankali.
Kamfanin Dillancin Labaran Najeriya ya bayar da rahoton cewa azumin watan Ramadan daya ne daga cikin rukunnan addinin Musulunci guda biyar da ke bayar da dama ga al’ummar musulmi wajen tsai da addu’a cikin kankan da kai da tsoron Allah.
Haka nan kuma lokacin azumi shi ne shimfida kyawawan halaye na rabo, gafara, soyayya, zaman lafiya da sadaukarwa domin ci gaban bil’adama da al’umma.
Manyan baki da suka halarci taron sun hada da matan ministoci da sauran matan Najeriya wadanda suka nuna matukar jin dadinsu ga uwargidan shugaban kasar bisa jajircewarta na ganin an zauna lafiya a Najeriya.